مائیکروسافٹ جلد سمارٹ واچ متعارف کروانے کا ارادہ رکھتی ہے؟

وال سٹریٹ جرنل کی ایک رپورٹ کے مطابق مائیکروسافٹ جلد دیگر بڑی کمپنیوں جیسے ایپل اور گوگل کی طرح سمارٹ واچ متعارف کروانے کا ارادہ رکھتی ہے۔

ایشیا سے مائیکروسافٹ کو پرزے فراہم کرنے والی کمپنی کے نمائندہ کے مطابق مائیکروسافٹ نے کلائی پر باندھنے والی گھڑی کے ایک ڈیزائن کے لیے پرزے طلب کیے ہیں اور اس حوالے سے انہوں نے مائیکروسافٹ کے ہیڈکوارٹرز میں اعلی عہدہداران سے ملاقات بھی کی ہے۔ تاہم مائیکروسافٹ کی جانب سے کسی قسم کے تبصرہ سے احتراز کیا جارہا ہے۔

ماہرین کے مطابق آنے والے چند سالوں میں پہننے والے گیجٹس کو کافی فروغ ملنے کا امکان ہے۔ یہ گیجٹس جہاں موجودہ سمارٹ فونز کی خصوصیات کے حامل ہونگے وہیں ان میں موجود سنسرز آپکو جسم کا درجہ حرارت، بلڈ پریشر اور دیگر جسمانی عضلات کے بارے میں تفصیلات بھی فراہم کریں گے۔ سمارٹ فونز یا ٹیبلیٹ کے مقابلے میں ان گیجٹس کی دیکھ بھال اور انہیں ایک جگہ سے دوسری جگہ لے جانا بھی بہت آسان ہے۔

یہاں یہ بات قابل ذکر ہے کہ مائیکروسافٹ نے کم و بیش ایک دہائی پہلے بھی ایسی ہی ایک گھڑی متعارف کروائی تھی جو ایف ایم ریڈیو کے ذریعے صارفین کو تازہ خبریں، میچز کے سکور اور پیغامات پہنچاتی تھی۔ تام یہ منصوبہ کچھ زیادہ کامیاب نہیں ہوسکا۔

آپ کے خیال میں کیا یہ سمارٹ واچز، سمارٹ فونز، ٹیبلیٹ اور دیگر گیجٹس کی طرح مقبولیت حاصل کر پائیں گی؟ تبصرہ ضرور کیجئے گا۔